Dyluniwyd y stampiau yma gan ddisgyblion ysgolion sydd ar hyd Llwybr Cadfan. Bu Prosiect Pererin, Tîm Llan yn Esgobaeth Bangor yn rhedeg gweithdai am bererindod gan ganolbwyntio ar bwyslais y Cwricwlwm Cymraeg ar gynefin – y ddealltwriaeth o gymuned, diwylliant a lle. O fewn y gweithdy cafodd y disgyblion y cyfle i ddylunio ac argraffu stampiau oedd yn adlewyrchu treftadaeth gyfoethog ac arwyddocâd ysbrydol safleoedd ar hyd y llwybr. Cynhyrchwyd gwaith oedd yn dathlu’r eglwysi, ffynhonnau, pentrefi a threfi ar hyd Llwybr Cadfan. Mae 26 stamp a gellir prynu pasbort i’w casglu oddi mewn iddo wrth gerdded y llwybr 12 diwrnod hwn. Mae 2 stamp ar gyfer pob dydd o gerdded, stamp ychwanegol ar gyfer Abaty Cymer, Dolgellau ac un ar gyfer Ynys Enlli y tu hwnt i ben Llŷn. Bu dros 600 o blant yn rhan o’r prosiect stampio gyda chyfuniad o waith 56 disgybl o fewn y 26 stamp buddugol.